Президент фармони билан Қорақалпоғистон тадбиркорлар учун кенг имкониятлар майдонига айланди

Қорақалпоғистондаги инвестиция лойиҳаларини молиялаштириш мақсадида банкларга 100 млн доллар ажратилади, бунда:
инвестиция лойиҳаларини молиялаштириш учун хорижий валютада 5 фоиз, миллий валютада 12 фоиз йиллик ставкаларда 10 йил муддатгача 5 йиллик имтиёзли давр билан кредит ажратилади. Банкининг маржаси хорижий валютадаги кредитлар бўйича 1 фоиз, миллий валюта 2 фоиз миқдорида белгиланади;
лойиҳалар банклар таъсисчилигидаги инвестиция компаниялари томонидан амалга оширилиб, кейинчалик улар "тайёр лойиҳа" сифатида тадбиркорларга сотилади;
банклар томонидан инвестиция лойиҳаларини молиялаштириш учун кредит маблағлари 5 йиллик имтиёзли давр билан 10 йил муддатга Марказий банкнинг асосий ставкасидан юқори бўлмаган миқдорда ажратилади.
Тадбиркорлик фаолиятини қўллаб-қувватлаш давлат жамғармаси томонидан, истисно тариқасида, инвестиция кредит миқдорининг 75 фоизгача, бироқ 5 млрд сўмдан ортиқ бўлмаган миқдорда, кафиллик шартномасини бир томонлама бекор қилмаслик шарти билан кафиллик тақдим этилади.
Кичик ҳамда ёшлар саноат ва тадбиркорлик зоналарида инвестиция мажбуриятларини бажарган тадбиркорларга ер участкалари, бино ва иншоотлар хусусийлаштириб берилади.
Оммавий савдоларда турган давлат мулки объектлари 3 ой муддатда сотилмаган тақдирда улар электрон танлов асосида энг яхши таклиф билдирган талабгорга инвестиция киритиш мажбурияти билан берилади.
2023-2024 йилларда Нукус шаҳрида 1 млн доллар, ҳудуднинг қолган туманларида 300 минг доллар миқдорида инвестиция киритиш мажбурияти билан лойиҳа ташаббускорларига Қорақалпоғистон Республикаси Вазирлар Кенгаши қарори асосида ер участкаларини тўғридан тўғри узоқ муддатли ижара ҳуқуқи билан бериш тизими жорий қилинади.
2024 йилдан бошлаб тижорат банкларига ҳудуд учун оилавий тадбиркорликни ривожлантириш дастурлари доирасида камида 2 трлн сўм кредит маблағлари ажратилади.
Ёшларнинг хорижий давлатларда таълим олишлари учун 4 йиллик имтиёзли давр билан 10 йил муддатга Марказий банкнинг асосий ставкасидан юқори бўлмаган миқдорда кредит маблағлари ажратилади.
Қорақалпоғистон Республикаси, вилоятлар ва Тошкент шаҳридаги савдо, умумий овқатланиш йўналишидаги ҳамда автомобилларга ёнилғи қуйиш ва электр қувватлантириш шохобчалари фаолиятини ташкил этган кичик тадбиркорлик субъектларига қуёш панелларини сотиб олиш ва ўрнатиш учун ажратилаётган кредитлар учун Тадбиркорлик фаолиятини қўллаб-қувватлаш давлат жамғармасидан белгиланган миқдор ва шартлар доирасида компенсация ажратилади.
Бу йил Хўжайли туманидаги 100 гектар ер майдонида "Ёшлар ижтимоий-иқтисодий маркази" барпо этилиб, унинг ҳудудида IT-парк, лойиҳа офислари, стартаплар технопарки, стартап лойиҳаларни қўллаб-қувватлаш "инновацион гуруҳлари" ташкил этилади. 
Шунингдек:
Ёшлар марказида фаолият юритаётган тадбиркор ва ёшларга уй-жойлар қурилади;
махсус иқтисодий зоналар иштирокчилари учун қонунчиликда белгиланган солиқ ва божхона имтиёзлари Ёшлар маркази ҳудудида жойлашган тадбиркорлик субъектларига ишсиз ёшларни иш билан таъминлаш шарти билан татбиқ этилади.